Prishtinë, 25 nëntor 2025
Biblioteka Kombëtare e Kosovës shënon këtë vit 81 vjet nga themelimi i saj. Me këtë rast, ju ftojmë të merrni pjesë në Ditën e Bibliotekës, një ceremoni solemne që do të mbahet në nder të këtij jubileu, bashkë me dashamirës të librit dhe miq të institucionit tonë.
Gjatë kësaj dite do të hapet edhe ekspozita e veçantë “Nga dorëshkrimi te digjitalja”, përmes së cilës vizitorët do të kenë mundësinë të shohin nga afër dorëshkrime të vjetra e të rralla, si dhe t’i shfletojnë ato në format digjital.
Këtë vit, Biblioteka ndan çmimin “Pjetër Bogdani” për Sharon Yang, në shenjë mirënjohjeje për kontributin e saj të çmuar në hartimin e rrjetit bibliotekar të Kosovës.
Ngjarja do të pasurohet edhe me një performancë artistike nga Baleti i Kosovës, duke i dhënë një dimension të veçantë artistik kësaj dite solemne.
Ju mirëpresim në Ditën e Bibliotekës – të festojmë së bashku dijen, kulturën dhe trashëgiminë tonë!
