Biblioteka Kombëtare e Kosovës ofron më shumë se 500 vende në sallat e leximit, duke siguruar një ambient të qetë dhe të këndshëm për përdoruesit e saj. Këto hapësira janë të dizajnuara për të mbështetur çdo lloj aktiviteti studimi dhe kërkimi, duke përfshirë mundësi për studim individual dhe grupor.
Kati i parë i bibliotekës është vendi ku ndodhen dy salla leximi, të cilat ofrojnë kapacitet deri në 400 ulëse. Sallat janë të ndërtuara për të krijuar një ambient të qetë dhe të ngrohtë për të gjithë ata që dëshirojnë të lexojnë ose studiojnë. Kjo hapësirë ofron kushte të përshtatshme dhe komoditet për përdoruesit.
Salla e madhe e leximit është një nga hapësirat më të mëdha dhe më të përpunuara arkitektonikisht. Ajo është e destinuar për studime të heshtura dhe të thella, kryesisht për studentët dhe kërkuesit.
Sallat e lexuesve janë dizajnuar specifikisht, që të mos kenë tavolina të rregulluara në radhë, për të evituar shpërqendrimin nga lëvizjet e vazhdueshme që krijohen në rreshtat e tavolinave, por kënde të vogla brenda sallave. Kështu, përdoruesit kanë mundësinë të kenë hapësira personale, në të cilat do të ndjehen më rehat gjatë studimit.
Në katin e dytë, Biblioteka Kombëtare e Kosovës ofron një Sallë të Periodikut, me rreth 75 ulëse dhe një hapësirë të dedikuar për të gjitha formatet e gazetave dhe revistave. Sallën e Periodikut mund ta vizitoni për të pasur qasje në publikimet periodike të ndryshme, ku mund të bëni porosinë e gazetave dhe revistave nga depo. Po ashtu, në hyrje të kësaj salle gjendet një fond i hapur i gazetave, që mund të përdoret nga përdoruesit e bibliotekës.
Kati i tretë është i dedikuar për përdoruesit shkencorë, me tre kabinete të dizajnuara për këtë qëllim. Këto kabinete ofrojnë gjithsej 66 ulëse, me Kabinetin I dhe II që përmbajnë nga 25 ulëse secili, ndërsa Kabineti III është i ndarë në 6 nënkabinete, nga të cilat 4 kanë nga 2 ulëse dhe 2 kanë nga 4 ulëse.
Këto hapësira janë të dedikuara për persona që punojnë në fushat e shkencës dhe kulturës, si për përdorues shkencorë dhe hulumtues, studiues të studimeve Master, studiues të Doktratës, si dhe Staf Akademik.
Të gjitha këto hapësira në Bibliotekën Kombëtare të Kosovës janë të krijuara për të mbështetur kërkimin, studimin dhe zhvillimin e dijes, duke ofruar një ambient të përshtatshëm për të gjithë përdoruesit. Angazhimi i bibliotekës është të sigurojë mundësi të shkëlqyera për të gjitha këto grupe, duke ofruar burime të pasura dhe një infrastrukturë të avancuar për studim dhe hulumtim.
