Në hyrje të Bibliotekës Kombëtare të Kosovës ndodhet Holli kryesor, një hapësirë madhështore me dysheme mermeri, dhe me kupolën më të madhe të Bibliotekës, e cila ndriçon çdo kënd të saj. Ky holl përfaqëson stilin e veçantë të ndërtesës, duke përshëndetur vizitorët që hyjnë në botën e dijes dhe kulturës.
Shkallëve për tek Holli i Ekspozitave, do të shihni muret të cilat janë të punuara me pjesëza të gurëve, të strukturuara si një mozaik, duke i dhënë kështu një pamje të veçantë bibliotekës. Kjo strukturë e jashtëzakonshme i jep një bukuri unike ndërtesës, duke krijuar një ndjenjë të harmonisë ndërmjet natyrës dhe kulturës.
Nëse shikoni ballkonin dramatik në kat të dytë, do e shihni atë të rrethuar nga Spiralat ilire, simbol i paraardhësve të lashtë të shqiptarëve, të cilat shfaqen si simboli i bibliotekës, dhe e bëjnë edhe më madhështore pamjen e këtij holli.
Po ashtu, për të shtuar këtë madhështi, pranë hollit tjetër të ekspozitave janë edhe Rozetat e punuara me mjeshtëri nga Simon Shiroka, i cili i ka dhuruar ato Bibliotekës Kombëtare të Kosovës, duke e lidhur ndërtesën kështu, me traditën vendase.
Afër këtij holli ndodhet edhe Qendra e informacionit, një pikë e rëndësishme për të gjitha pyetjet dhe informacionet që mund të keni lidhur me objektin, hapësirat ose materialet e Bibliotekës Kombëtare të Kosovës.
