Më 23 prill 2010 , Biblioteka Kombëtare dhe Universitare e Kosovës organizoi manifestimin kulturor Dita Ndërkombëtare e Librit dhe e të Drejtës së Autorit.

Siç dihet, nëpërmjet një rezolute, UNESCO-ja, 23 prillin e ka shpallur si Dita Botërore e Librit, duke e konsideruar faktin se libri ka qenë, historikisht, instrumenti më i fuqishëm i shpërndarjes së njohurive dhe mjeti më efikas për të siguruar ruajtjen e këtyre njohurive. Pra, është kjo një datë simbolike që lidhet me literaturën botërore, pasi në këtë datë, në vitin 1616, vdiqën Servantes, Shakespeare dhe Garcilaso de la Vega, ndërsa që 23 prilli shënon edhe lindjen ose vdekjen e shkrimtarëve të tjerë, si Maurice Druon, K. Laxness, Vladimir Nabokov, Joseph Pla dhe Manuel Mejia Vallejo. Ideja e përkujtimit të Ditës Botërore të librit e ka origjinën e vet në Spanjë, në zonën e Katalonjës, ku atij që blinte një libër i dhurohej edhe një trëndafil.

Më rastin shënimit të këtij përvjetori, BKUK ka ndarë 99 libra në shenjë të 99 kupolave të saj për nxënës të shkollave fillore, të mesme, studentë, kriues dhe punonjës të bibliotekës.

Po ashtu, me rastin e kësaj dite, u dhuruan libra për bibliotekën e shkollës fillore “Naim Frashëri” të Prishtinës, si dhe u promovua hapja e bibliotekës së shkollës fillore “Dituria” të fshatit Shkabaj të Obiliqit - si ide e projektit të iniciuar para tri vitesh nga BKUK dhe botuesit e Kosovë, për themelimin e nga një biblioteke të re në Kosovë, çdo vit - me rastin e Ditës Ndërkombëtare të Librit dhe e të Drejtës së Autorit, ku botuesit, institucionet dhe individë, do të dhurojnë botimet e tyre për të ndihmuar formimin e një biblioteke në Kosovë.

Biblioteka Kombëtare dhe Universitare e Kosovës dhe Ambasada e Shteteve të Bashkuara të Amerikës në Prishtinë, nga 12 deri më 17 prill 2010, organizuan Edicionin e VIII-të të Javës së Bibliotekës në Kosovë.

Manifestimi qendror u mbajt në Bibliotekën Kombëtare dhe Universitare të Kosovës, ndërsa që u zhvilluan aktivitete edhe në bibliotekat e qytetit të Prishtinës, të Prizrenit dhe të Gjakovës. Gjatë kësaj Jave u organizuan aktivitete të rëndësishme, si: ligjërata të veçanta nga fusha e bibliotekarisë, e trashëgimisë kulturore të Kosovës, e arsimit, si dhe ligjërata speciale kushtuar jetës dhe veprës së Fehmi Aganit. Gjithashtu, u mbajtën edhe promovime, ekspozita të librave të rrallë, të fotografive të vjetra të qytetit të Prizrenit, si dhe të qytetit të Prishtinës, ekspozita me vepra të artistëve të rinj, etj.

Gjatë Javës, Këndi Amerikan, i cili gjendet në kuadër të BKUK-së, zhvilloi aktivitete të ndryshme për pesë ditë me radhë, ndërsa aktivitete u zhvilluan edhe në bibliotekat ndërkomunale të Prishtinës, Prizrenit dhe Gjakovës, si dhe në Bibliotekën e Universitetit Amerikan në Kosovë.

Në Javën e Bibliotekës në Kosovë mori pjesë Catherine Marsicek, Zyrtare për burime të informacionit për Austri, vende të Ballkanit dhe Kaukaz në Ambasadën Amerikane në Vjenë, e cila mbajti ligjërata me interes në fushën e bibliotekarisë. Po ashtu, me tema e diskutime, kontribuuan edhe udhëheqës e ekspertë-bibliotekarë nga Shqipëria dhe Kosova.

Gjatë Javës së Bibliotekës, Biblioteka Kombëtare e Shqipërisë i dhuroi BKUK-së - të plotë, revistën e digjitalizuar “Albania” të Faik Konicës.

Në këtë Javë, u bë edhe hapja solemne e bibliotekës së shkollës fillore “Xhemajl Mustafa”. Në këtë ceremoni mori pjesë edhe presidenti i Republikës së Kosovës - Z. Fatmir Sejdiu dhe shumë udhëheqës të tjerë të politikës dhe kulturës, si dhe dashamirës të librit dhe bibliotekës.

AKTIVITETET

Hapjen e Javës së Bibliotekës në Kosovë e bëri drejtori i BKUK-së - dr. Sali Bashota, i cili foli për rëndësinë e kësaj Jave si një ngjarje kulturore e vitit për librin dhe bibliotekat që ka peshë kulturore për zhvillimin e kulturës dhe të bibliotekave në Kosovë.

Në një fjalim, në hapje të Javës, Zëvendës-ambasadori i Shteteve të Bashkuara të Amerikës në Prishtinë, Michael J. Murphy, uroi për zhvillim të mirë dhe arritje të rezultateve të këtij manifestimi, duke theksuar njëkohësisht përkushtimin e Ambasadës për përkrahje në përgatitje profesionale të stafit, modernizim të shërbimeve, si dhe pasurimi të koleksioneve të BKUK-së.

Hapjen e Javës së Bibliotekës në Kosovë, e përshëndeti edhe dr. Enver Hoxhaj, Ministër i Arsimit, Shkencës dhe Teknologjisë, i cili theksoi, përveç të tjerash, për mbështetjen e vazhdueshme që do t’i jap BKUK-së Qeveria e Republikës së Kosovës, që qytetarët e Republikës së Kosovës të bëhen pjesë e kulturës së leximit, e të shtetit të dijes.

BKUK, në hapje të Javës, ndau mirënjohje për Punëtor të Dalluar, e cila iu dha Nexhbedije Rizës, bibliotekare e Departamentit të Katalogimit; Student i Dalluar - Faton Bujupit, si dhe Gazetar i Dalluar, për përcjellje të aktiviteteve dhe punës së BKUK-së, gazetarit të gazetës ditore “Kosova Sot” - Isa Vatovci.

Aktivitetet e Javës së Bibliotekës në Kosovë kanë filluar me ligjëratën speciale të mbajtur nga dr. Aurel Plasari, drejtori i Bibliotekës Kombëtare të Shqipërisë - me temën “Albania” e Konicës për “ne” dhe për “të tjerët”, i cili ka folur për rëndësinë kulturore të kësaj reviste dhe mundësitë që tashmë ofrohet, pas digjitalizimit të përmbledhjes 12-vëllimshme të revistës “Albania” të Faik Konicës nga Biblioteka Kombëtare e Shqipërisë, për të gjitha institucionet hulumtuese e arsimore, si dhe për të gjithë përdoruesit e saj.

Kështu, Jehona Shala në ligjëratën e saj me temën “Rivizitimi i Koleksioneve te Veçanta”, ka theksuar për këtë problem, duke u ndalur edhe te termi rivizitim, që sipas saj, në diskursin teorik të dijeve humane përafërsisht nënkupton rishqyrtimin e një pune paraprake me tendencën për ta rifreskuar e pasuruar atë; pra kjo e nderon klasiken duke e bërë atë të përdorshme edhe për modernen.

Nehat Krasniqi, në ligjëratën: “Bibliotekat e periudhës osmane në trojet shqiptare në dritën e dorëshkrimeve”, ka dhënë një historik të ekzistimit të këtyre bibliotekave, mbështetur mbi të dhënat e dorëshkrimeve, sipas të cilave, biblioteka me e vjetër, sipas të dhënave - e themeluar në trojet shqiptare, është ajo e Medresës së Ishak Beut në Shkup, e ngritur rreth vitit 1411 dhe e vakëfuar në vitin 1444.

Edona Munishi - Kokollari, në ligjëratën: “Biblioteka Muzikore: e ardhmja shpirtërore dhe materiale”, ka shtjelluar problemin e zhvillimit të Bibliotekës Muzikore në rrafshin e hartimit të rregulloreve të pasurimit të koleksioneve muzikore, kthimit të kulturës së shkruar apo të dokumentuar të orientimeve të përgjithshme të kësaj biblioteke, si dhe vetë pasurimin me tituj të rinj, duke ofruar dhe propozuar gjithnjë mënyra të zgjidhjeve të këtyre problemeve.

Adil Olluri në ligjëratën e tij me temën: “Rëndësia e Bibliotekave legatë për BKUK-në dhe kulturën shqiptare në Kosovë“, ka folur për rëndësinë e Bibliotekave legatë, veçanërisht për Bibliotekat legatë të Fehmi Aganit dhe Krist Malokut, për Bibliotekën Kombëtare dhe Universitare të Kosovës dhe kulturën shqiptare në Kosovë. Rëndësia e tyre është trajtuar në tri dimensione: bibliotekare, kulturore dhe shkencore.

Jetish Kadishani ka folur për “Historikun e fotografisë në Kosovë”, duke i dhënë rëndësi historikut të fotografisë në vendin që sipas hulumtimeve të bëra deri më tani fotografia zë fill që në fillimi të shekullit XX, me fotografët e Prizrenit, Pejës, Gjakovës, Prishtinës, Mitrovicës, Janjevës, etj.

Albanë Mehmetaj në ligjëratën e saj me temën: “Hylli i Dritës”, ka folur për rëndësinë kulturore të kësaj reviste - si e para e botuar brenda territorit të Shqipërisë, e cila mblodhi rreth vetes, elitën e “uritur” shqiptare për të shpërthyer me sfera të ndryshme të dijes. Që në fillime atë e mbërthyen intelektualë shqiptarë të krishterë, por edhe të tjerë, për t’u bërë ngadalë një tribunë shqiptare në plot kuptimin e fjalës.

Bedrije Mekolli, në ligjëratën: “Roli dhe përgjegjësia e Sektorit të Restaurimit dhe Konservimit”, ka folur për aktivitetet e këtij sektori dhe mënyrën se si ruhen librat e rrallë nga dëmtimet e mundshme, me theks të veçantë ato në BKUK.

Një sesion tjetër në kuadër të Javës së Bibliotekës në Kosovë, i është kushtuar jetës dhe veprës së akademik Fehmi Aganit. Në këtë sesion ka referuar Akademik Rexhep Ismajli, i cili e ka vlerësuar figurën e akademik Fehmi Agani si njeri të librit, në konceptin e tij të botës së librit dhe të krijimtarisë shkencore e shkrimore. Duke folur për kontributin e Aganit në politikë, akademik Ismajli ka theksuar se në gjithë veprimtarinë e tij, ka qenë elaborimi dhe mbrojtja e idesë së pavarësisë së Kosovës.

Për figurën e Fehmi Aganit, ka folur edhe zëvendës-ministri i Arsimit, Shkencës dhe Teknologjisë - dr. Agim Hyseni, i cili tha se Fehmi Agani ishte një ndër vendimtarët dhe veprimtarët më të ndërgjegjshëm e më të përgjegjshëm, si dhe ndër më të shquarit e shkencave shoqërore politike e të lëvizjes politike shqiptare të gjysmës së dytë të shekullit XX.

Ndërsa dr. Mentor Agani, duke folur për figurën e të atit të tij - akademik Fehmi Agani, tha me emocion se për fare pak nuk ia doli ta shohë dhe të marrë pjesë në vendosjen e kulmit të godinës së shtetësisë së Kosovës, mirëpo ai së bashku me shokët dhe kolegët e tij Gazmend Zajmi, Ali Hadrin, Dervish Rozhajën e shume të tjerë, ishte njëri ndër individët kryesorë që i vendosen themelet e kësaj godine.

Gjatë Javës së Bibliotekës në Kosovë, është mbajtur edhe sesioni për trashëgiminë Kulturore në Kosovë. Në këtë sesion, drejtori i Arkivit të Kosovës - Jusuf Osmani ligjëroi me temën “Arkivat dhe dokumentet arkivore”, duke theksuar rëndësinë e arkivave në mbrojtje të thesarit kulturor të një populli. Nga dokumentet arkivore, siç theksoi ai, ruhet në arkiva pjesa më e madhe e asaj që dimë për të kaluarën tonë, andaj pa arkiva as e kaluara e jonë e as e sotmja nuk do të ishin të njëjta.

Kryetarja e Këshillit të Kosovës për Trashëgimi Kulturore, Edi Shukriu, mbajti ligjëratën me titull: “Trashëgimia kulturore- identiteti i Kosovës”, e cila, ndër të tjera, u shpreh për përkujdesje më të madhe në mbrojtje të trashëgimisë kulturore të Kosovës, duke theksuar se nuk duhet lejuar të përsëritet fakti që trashëgimia kulturore të përdoret si mjet i presionit politik. Ajo theksoi se një kontingjent artefaktesh ndodhen në Beograd, duke bërë thirrje që të kthehen në vendlindje, aty ku janë krijuar.

“Stela e kalorësitë dardanë nga Ulpiana”, ishte tema për të cilën ligjëroi Haxhi Mehmetaj, drejtori i Institutit për Monumenteve Kulturore dhe i Muzeut të Prishtinës. Sipas tij, zbulimi i këtij monumenti sepulkral është me vlerë për njohje të kulteve, të antroponimisë dhe artit të popullatës së Ulpianës, në veçanti, dhe të Dardanisë, në përgjithësi.

Në përmbyllje të këtij sesioni, ka folur drejtori i BKUK-së - Sali Bashota, i cili, gjithashtu, ka bërë thirrje që në kuadër të memories së botës të punohet edhe në ruajtjen e memories së Kosovës, e cila mund të ndihmohet dhe pasurohet me projekte të reja nga njerëzit kompetentë, meqë vendi ynë ka një trashëgimi të pasur, e cila do të duhej të ruhej dhe të vlerësohej drejtë.

Më 7 Tetor 2009, Drejtori i Bibliotekës Kombëtare dhe Universitare të Kosovës Prof.Dr. Sali Bashota dhe drejtori Bibliotekës Kombëtare dhe Universitare të Kroacisë Prof.Dr. Tihomil Maštrović nënshkruan Marrëveshjen e Bashkëpunimit në mes të dy Bibliotekave Kombëtare, në ambientet e Bibliotekës Kombëtare dhe Universitare të Kosovës.

Kjo marrëveshje parasheh bashkëpunim në mes të dy bibliotekave në nivele të ndryshme profesionale, siç janë: shkëmbimi ndërkombëtar i botimeve, huazimet ndërkombëtare ndërmjet bibliotekave, pastaj shkëmbimi i ndërsjellë i përvojave profesionale, informatave dhe i arritjeve shkencore në fushat me interes të veçantë, si: grumbullimi i fondeve, lejimi i botimeve të huaja që i përkasin atij vendi, ekspozita të përbashkëta dhe aktivitete tjera nga fusha e bibliotekarisë.

Drejtori i BKUK-së Prof.Dr. Sali Bashota e çmoi si një moment të rëndësishëm nënshkrimin e marrëveshjes në kuadër të bashkëpunimit të BKUK-së me Bibliotekën Kombëtare dhe Universitare të Kroacisë, krahas marrëveshjeve të mëhershme të nënshkruara me bibliotekat simotra të rajonit, Evropës dhe Amerikës.

Sipas Prof.Dr.Sali Bashota,nënshkrimi i kësaj marrëveshje është i veçantë,duke ditur faktin se bibliotekaria e Kosovës ka nevojë për ofrimin e përvojave dhe rezultate më të arritura të bibliotekarisë kroate në shumë drejtime.

Edhe Drejtori i Bibliotekës Kombëtare dhe Universitare të Kroacisë Prof.Dr Tihomil Maštrović e vlerësoi lart frymën e bashkëpunimit mes dy institucioneve duke përmendur edhe kontributin e madh të krijuesve dhe intelektualëve kroatë për shqiptarët dhe çështjen shqiptare në përgjithësi.

E veçanta e kësaj marrëveshje është se BKUK-ja përdor programin e automatizuar ALEPH 500, program të cilën tanimë ka filluar ta përdor edhe BKU-ja e Kroacisë.

Gjatë qëndrimit dyditor delegacioni nga Biblioteka e Kombëtare dhe Universitare e Kroacisë janë njoftuar më për së afërmi më punën që zhvillohet nëpër departamentet e Bibliotekës Kombëtare dhe Universitare të Kosovës, si dhe takime të ndryshme duke filluar nga takimi me ministrin e Kulturës,Rinisë dhe Sportit z.Valton Beqiri, që ka premtuar së do të mbështesë bashkëpunimin në fushën e shkëmbimit të librit dhe të informacioneve nga kjo fushë, përmes të cilit do të forcohen marrëdhëniet dhe lidhjet kulturore ndërmjet Kosovës dhe Kroacisë.

BKUK-ja merr pjesë në Kongresin e 75-të i IFLA-s në Milano

Kongresi i 75 i IFLA-s (Federata Ndërkombëtare e Shoqatave dhe Institucioneve Bibliotekare) mbahet në Milano të Italisë prej datës 23-27 gusht 2009. Kjo ngjarje organizohet gjithnjë nga IFLA dhe nga vendi mikpritës. IFLA është shoqata më e madhe botërore, në nivel ndërkombëtar, për bashkimin e bibliotekave dhe organizatave të tjera që merren me informacion.

BKUK-ja, përmes përfaqësuesve të saj, merr pjesë për herë të tretë në këtë ngjarje. Sivjet do të marrin pjesë me ftesë zyrtare të IFLA-s tre përfaqësues nga Kosova: Prof. dr. Sali Bashota, drejtor i BKUK-së, z. Sami Piraj, drejtor për Kulturë në MKRS, dhe z. Besim Kokollari, udhëheqës i programit Aleph në BKUK dhe njëherësh kryetar i Shoqatës së Bibliotekarëve të Kosovës.

Qëllimi i pjesëmarrjes është njohja me zhvillimet e reja në fushën e bibliotekarisë, krijimi i kontakteve më të gjera me bibliotekarë të vendeve të ndryshme në shkëmbimin e ideve, përvojave dhe praktikave të ndryshme dhe, po ashtu, njohja më për së afërmi me zhvillimet e teknologjisë së informacionit që përdoret në avancimin e shërbimeve bibliotekare. Në këtë kontekst, përfaqësuesit e BKUK-së dhe MKRS-së do të ndjekin ligjërata, kumtesa dhe prezantime me interes, do të realizojnë takimet e aranzhuar zyrtare me përfaqësues të IFLA-s dhe bibliotekave të ndryshme, si dhe të vizitojnë institucione bibliotekare si dhe panairin e teknologjisë së informacionit ku ekspozohen platforma të ndryshme të botimeve elektronike dhe softuerëve të ndryshëm për automatizim e digjitalizim e shërbimeve të bibliotekave.

BKUK ka marrë pjesë edhe më herët në kongreset e IFLA-s, si në vitin 2005 në Oslo të Norvegjisë; pastaj në vitin 2008 në Quebec të Kanadasë, ku pjesëmarrja e BKUK-së u financua nga OSBE, me ç’rast janë realizuar takime të nivelit të lartë me Sekretarin Gjeneral të IFLA-s Peter J. Lor, dhe me anëtarë të Bordit Udhëheqës të IFLA-s për të cilat ka qenë i njoftuar opinioni ynë.

Do theksuar se në vitin 2008 gjatë punimeve të Kongresit të IFLA-s në Quebec, BKUK dhe Shoqata e Bibliotekarëve të Kosovës (ShBK) kanë parashtruar kërkesë zyrtare për anëtarësim të plotë në IFLA. Që prej atëherë kjo kërkesë është ende në shqyrtim nga organet udhëheqëse të IFLA-s. BKUK dhe ShBK janë njoftuar nga IFLA se gjatë punimeve të këtij Kongresi do të miratohen rregulla dhe procedura të cilat do t’i ndjek Kosova për anëtarësim në këtë organizatë. Pra, në kuadër të aktiviteteve të pjesëmarrësve nga Kosova në këtë Kongres, një ndër synimet kryesore do të jetë edhe bërja e përpjekjeve për kapërcimin e pengesave për anëtarësimin e institucioneve tona bibliotekare në këtë organizatë.

BKUK-ja, përveç se është një ndër themelueset e Unionit të Bibliotekave të Ballkanit, është anëtare edhe e organizatave të ndryshme në nivel ndërkombëtarë, si anëtare e ISBN-së (Numrit standard ndërkombëtar të librit), ISMN-së (Numrit standard ndërkombëtar të Muzikës), pastaj e eIFL.net (organizatë e cila merret me negocimin e burimeve elektronike për vendet në zhvillim). Ajo ka një bashkëpunim të shkëlqyer me Bibliotekën e Kongresit, ShBA, pastaj me biblioteka të ndryshme në Zvicër, Gjermani, Turqi, Angli, e po ashtu edhe me bibliotekat e rajonit të Ballkanit.

Biblioteka Kombëtare dhe Universitare e Kosovës një nga themeluesit e Unionit të Bibliotekave të Ballkanit


Më 29 korrik 2009, në Edirne të Turqisë, u themelua Unioni i Bibliotekave të Ballkanit. Themelues të Unionit janë: Biblioteka Qendrore e Universitetit të Trakisë në Edirne (Turqi), Biblioteka Kombëtare dhe Universitare e Kosovës në Prishtinë (Kosovë), Biblioteka Universitare në Sofie (Bullgari), Biblioteka Universitare në Rumani, Biblioteka Universitare Shtetërore në Sofie (Bullgari), Biblioteka Universitare në Tuzëll (Bosnjë dhe Hercegovinë), Biblioteka Universitare në Beograd (Serbi), Shoqata e Bibliotekarëve të Turqisë, Biblioteka Universitare e Universitetit Marmara në Stamboll (Turqi).

Themelimi i këtij Unioni ka për qëllim të krijojë një rrjet funksional të bashkëpunimit të bibliotekave në vendet e Ballkanit, të sigurojë mbështetje për ruajtjen e trashëgimisë kulturore të Ballkanit, si dhe të përmirësojë mundësinë e ofrimit të informacionit të koleksioneve e bibliotekave të Ballkanit.

Unioni i Bibliotekave të Ballkanit është i hapur për anëtarësi të bibliotekave, arkivave, institucioneve dhe shoqatave që kanë të bëjnë me librin dhe informacionin. Ky Union do të organizojë konferenca me karakter shkencor, simpoziume, seminare dhe aktivitete të tjera lidhur me zhvillimin e bibliotekave në përgjithësi.

Simpoziumi i parë shkencor me karakter ndërkombëtar i Unionit do të mbahet më 21-22 tetor 2010 në Edirne (Turqi), me temën bosht “Dokumentet Osmane për Edirnen në Arkivat e Ballkanit”.

Unioni i Bibliotekave të Ballkanit, ku BKUK është një nga themeluesit, gjithsesi, hap një perspektivë të re në përfaqësimin e bibliotekave të Kosovës në institucionet ndërkombëtare të bibliotekave.

Sesion bibliotekar me temën:
 
Sistemi i Integruar Aleph500 në Bibliotekat e Kosovës


Me 4 shtator 2008, në BKUK, u mbajt Sesioni bibliotekar me temën: Sistemi i Integruar Aleph500 në Bibliotekat e Kosovës.
 
Në këtë sesion morën pjesë mese 100 bibliotekarë nga të gjitha bibliotekat e Kosovës dhe zyrtarë të arsimit e kulturës.
Ky sesion kishte për qëllim njoftimin e bibliotekarëve, profesionistëve dhe vendimmarrësve për biblioteka lidhur me fazën e parë të modernizimit dhe automatizimit të bibliotekave publike të Kosovës. Automatizimi i bibliotekave në Kosovë është i domosdoshëm, duke u mbështetur në zhvillimin e përgjithshëm të shoqërisë kosovare.
 
Ky sesion kontribuoi në këtë drejtim,duke ofruar një platformë dhe projekte konkrete për realizimin e këtij synimi të Bibliotekës Kombëtare dhe Universitare të Kosovës dhe bibliotekave të tjera publike në Kosovë.
 
Sesioni u zhvillua në dy pjesë ku referuan dhe paraqitën kumtesa e prezantime:
 
1. Dr. Sali Bashota, Drejtor i Bibliotekës Kombëtare dhe Universitare të Kosovës, i cili mbajti një fjalë hapjeje:
Fjala e hapjes e Dr. Sali Bashotës në këtë sesion; » më gjërsisht ...
 
2. Besim Kokollari, Udhëheqës i programit Aleph500, me temën: Projekti Aleph në rrjetin e bibliotekave të Kosovës; » më gjërsisht ...
 
3. Ramush Zeka, Shef i departamentit të TI-së, me temën: Administrimi harduerik dhe softuerik i SIB Aleph500;
 
4. Lavdije Rrahmani, Shefe e departamentit të pasurimit, me temën: Aleph-i dhe procesi i pasurimit të koleksioneve në BKUK.
 
5. Bukurije Haliti, Shefe e departamentit të katalogimit, me temën: Katalogu dhe katalogimi - perspektivat e zhvillimit të programit Aleph në Kosovë.
 
Sesioni u përcoll me diskutime dhe debate konstruktive, ku të pranishmit paraqitën pikëpamje të ndryshme lidhur me zhvillimin dhe modernizimin e bibliotekave të Kosovës.