Në ceremoninë e nënshkrimit të marrëveshjes në ambientet e Bibliotekës Kombëtare të Hungarisë ishte e pranishme edhe Shkëndije Sherifi, ambasadore e Republikës së Kosovës në Budapest, e cila në fjalën e saj përshëndetëse e theksoi rëndësinë e veçantë të kësaj marrëveshjeje në nivelin kulturor, duke theksuar se kjo është marrëveshja e parë që realizohet midis dy institucioneve shtetërore të Kosovës dhe Hungarisë.
Drejtoresha e Bibliotekës Kombëtare të Hungarisë dr.Adrea Sajo, e vlerësoi lart nënshkrimin e marrëveshjes së bashkëpunimit midis dy bibliotekave kombëtare, duke i dëshiruar mirëseardhje sa më të shpejtë BKUK-së në gjirin e asociacioneve më të rëndësishme europiane e më gjerë dhe me këtë rast shpehu gatishmërinë për përkrahje dhe mbështetje të përhershme.
Ndërkaq drejtori i Bibliotekës Kombëtare dhe Universitare të Kosovës dr.Sali Bashota duke i vlerësuar lidhjet miqësore shqiptaro-hungareze, veçanërisht kontributin e albanologëve hungarezë për gjuhën, kulturën dhe historinë e shqiptarëve, ndër të tjera, tha se kjo marrëveshje do të hap një dritare të re në fushën e bashkëpunimit midis dy institucioneve më të larta bibliotekare të të dy shteteve. Drejtori i BKUK-së e përmendi faktin se Biblioteka Kombëtare e Hungarisë ka koleksione mjaft të pasura, sidomos për jetën dhe veprën e Skënderbeut, si dhe mjaft materiale të tjera bibliotekare, të cilat objekt trajtimi i kanë periudhat historike të shqiptarëve në Ballkan e më gjerë.
Marrëveshja e nënshkruar midis dy palëve parasheh bashkëpunimin e këtyre dy bibliotekave kombëtare në këto fusha: huazimet e koleksioneve , organizimin e ekspozitave, shkëmbimin reciprok të përvojave profesionale, të informacioneve dhe arritjeve shkencore në fushat e interesit të veçantë, shkëmbimin e specialistëve me qëllim të trajnimeve dhe aftësimit profesional, pastaj s hkëmbimin e përvojave në fushën e teknologjisë së informacionit, si dhe digjitalizimin e materialeve bibliotekare, ruajtjen dhe restaurimin e teknologjisë, rrjeteve elektronike.
Në këtë marrëveshje parashihet edhe pjesëmarrja e përbashkët në projekte ndërkombëtare, me qëllim të modernizimit të shërbimeve dhe të arritjes së cilësisë në informacionin global të bibliotekave evropiane e më gjerë.
Gjatë vizitës dyditore ambasadorja Shkëndije Sherifi dhe drejtori Sali Bashota u takuan me albanologun Krisztain Csaplar-Degovics, i cili i dhuroi BKUK-së librin e tij në gjuhën hungareze që për temë i ka ngjarjet në periudhën e Rilindjes kombëtare shqiptare.
Gjithashtu, vlen të përmendet edhe vizita në shtëpinë e albanologut të ndjerë hungarez Istvan Schutz , i cili ishte njëri ndër pjesëmarrësit më të rregullt në Seminarin Ndërkombëtar për Gjuhën, Letërsinë dhe Kulturën Shqiptare që organizohet në Prishtinë. Në takimin me Gergely Schutz , u bisedua për koleksionin e librave të albanologut të mirënjohur hungarez, si dhe për mundësinë e botimit të fjalorit voluminoz shqip-hungarisht, i cili është në dorëshkrim.

Foto gjatë nënshkrimit të marrëveshjes

Më 10 tetor 2011 drejtori i Bibliotekës Kombëtare dhe Universitare të Kosovës Sali Bashota me bashkëpunëtorët e tij pati një takim zyrtar në Bibliotekën Universitare “Sh. Kliment Ohridski” të Universitetit të Sofjes, ku u takua me drejtoreshën Anna Angelova. Në takimin me rektorin e Universitetit të prof.dr. Sofjes Ivan Ilchev, ku mori pjesë edhe Ambasadorja e Republikës së Kosovës Ariana Zherka Hoxha, u diskuta për shumë fusha të bashkëpunimit midis institucioneve të Bullgarisë dhe të Kosovës, sidomos në sferën e kulturës, arsimit dhe shkencës.

Gjatë bisedës, si nga ana e rektorit të Universitetit të Sofjes, po ashtu, edhe nga Ambasadorja e Republikës së Kosovës në Sofje, u trajtuan temat më të rëndësishme që kanë të bëjnë me një bashkëpunim të frytshëm në zhvillimin e dy bibliotekave, por edhe në arritjet tjera në nivelin akademik e më gjerë.
Në ambientet e Bibliotekës Universitare ”Sh. Kliment Ohridski” të Sofjes u nënshkrua marrëveshja e bashkëpunimit midis dy institucioneve bibliotekare të të dy shteteve.
Marrëveshja për një bashkëpunim të vazhdueshëm midis këtyre dy institucioneve do të realizohet në këto fusha: vizita e specialistëve të bibliotekave nga të dy palët, trajnime të bibliotekarëve në programin e integruar bibliotekar Aleph 500, shkëmbime të dokumenteve, botimeve shkencore, bashkëpunim në fushën e huazimit ndërbibliotekar, botime të përbashkëta, takime shkencore dhe seminare etj.
Kjo marrëveshje do të hap një mundësi të mirë të bashkëpunimit konkret e rezultativ, sidomos në aftësimin profesional me qëllimin të avancimet të dijes për bibliotekarinë dhe në përmirësimin e njohurive në fusha të veçanta të sistemit të automatizuar bibliotekar, më konkretisht në modulin e qarkullimit dhe të huazimit ndërbibliotekar, por edhe në module të tjera.
Drejtori i Bibliotekës Kombëtare dhe Universitare të Kosovës pati një takim edhe me studentët bullgarë, të cilët e studiojnë gjuhën shqipe në Degën e Ballkanologjisë në Universitetin e Sofjes, si dhe me pedagogët e albanologjisë Russana Beyler dhe Anton Panchev.
Vizita u realizua në mbështetje të pakursyer nga Ambasada e Republikës së Kosovës në Sofje.

U bë promovimi i projektit: Portali Albanologjik
http://www.portalialbanologjik.org/

Portali albanologjik është shërbim pa pagesë, që ofron informacion të larmishëm për Shqipërinë dhe shqiptarët, ku vend të veçantë zënë burimet bibliografike dhe koleksionet e digjituara të trashëgimisë kulturore kombëtare. Nëpërmjet tij mundësohet kërkimi dhe qasja në vlerat e rralla të trashëgimisë kombëtare në çdo kohë, nga kudo dhe nga kushdo. Website-i ofron shërbime si: të dhëna rreth historikut të krijimit të portalit; informacion për botime albanologjike, albanologë, hyrje të reja (libra, artikuj, periodikë) në të dy bibliotekat gjegjëse; qasje në burime të kombinuara digjitale dhe jo-digjitale, burime bibliografike etj.

Trusted archives for scholarship

Building a digital library of scholarly resources 
from and about Africa